D'Administratioun

d'emweltverwaltung

Eis Aarbecht

D'Ëmweltverwaltung steet am Déngscht vun der Gesellschaft fir en héijen Niveau un Ëmweltschutz a Liewensqualitéit vum Mënsch a sengem Ëmfeld sécher ze stellen.

Mir ënnerstëtzen déi politesch Entscheedungsprozesser am Ëmweltberäich a stelle sécher, dass eis Gesetzgebungen am Ëmweltberäich ëmgesat ginn. Mir begleeden a kontrolléiere mënschlech Aktivitéiten déi een Impakt op eis Ëmwelt kéinten hunn. Mir iwwerwaachen a bewäerten den Zoustand vun eiser Ëmwelt. Mir ënnerstëtzen ökologescht Handelen an ëmwelttechnesch Neierungen.

Zesumme mat der Naturverwaltung an der Wasserverwaltung si mir zoustänneg fir d’Ëmsetzung vun der Ëmweltpolitik vun der Lëtzebuerger Regierung.  

Eis Wäerter

Responsabilitéit: Mir sinn eis de Konsequenze vun eiser Aarbecht bewosst an droen dozou bäi andeems mir eis Aufgabe mat Grëndlechkeet a mat Integritéit erfëllen.

Equipegeescht a Know-how: Mir mobiliséieren déi individuell a kollektiv Kompetenze vun eise Mataarbechter, a mir sti fir eng participativ Approche an der Zesummenaarbecht mat eise Partner a Interessevertrieder.

Asaz: Mir huelen aktiv Deel um Opbau vun engem ëmweltfrëndleche Gesellschaftsmodell.

Service a Respekt: Mir leeschten héichwäerteg Déngschtleeschtunge fir d'Bierger, eis Partner eis Interessevertrieder, d'Betriber an d'Gesellschaft. An eiser deeglecher Aarbecht entwéckele mir en opmierksamt Vertrauensverhältnes zu eisem Géigeniwwer.

Eis Visioun

D'Ëmweltverwaltung ass eng national Referenz. Mir schütze proaktiv d'Ëmwelt an d'Liewensqualitéit vum Mënsch a sengem Ëmfeld.

Mir verwalten eis Ëmwelt nohalteg duerch eng geziilte wëssenschaftlech, concertéiert an integrativ Approche.

Eng effizient Gestioun vun eiser Ëmwelt erlaabt et eis eng héichwäerteg Déngschtleeschtung fir de Bierger, d'Regierung an d'Betrieber kënnen ze leeschten.

Mir sinn e kompetenten a zouverlässege Partner fir d'Lëtzebuerger Regierung.

 

Leitbild_LU

Aktualiséiert